Шрифт

22 мая.

Канон преподобному Иосифу Оптинскому

Канон преподобному Иосифу Оптинскому
Молитвы предначинательные

Моли́твами святы́х оте́ц на́ших, Го́споди Иису́се Христе́, Бо́же наш, поми́луй нас, ами́нь.

Сла́ва Тебе́, Бо́же наш, сла́ва Тебе́.

Царю́ Небе́сный, Уте́шителю, Ду́ше и́стины, И́же везде́ сый и вся исполня́яй, Сокро́вище благи́х и жи́зни Пода́телю, прииди́ и всели́ся в ны, и очи́сти ны от вся́кия скве́рны, и спаси́, Бла́же, ду́ши на́ша.

Святы́й Бо́же, Святы́й Кре́пкий, Святы́й Безсме́ртный, поми́луй нас. Трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

Пресвята́я Тро́ице, поми́луй нас; Го́споди, очи́сти грехи́ на́ша; Влады́ко, прости́ беззако́ния на́ша; Святы́й, посети́ и исцели́ не́мощи на́ша, и́мене Твоего́ ра́ди.

Го́споди, поми́луй, трижды.

Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь.

О́тче наш, И́же еси́ на Небесе́х, да святи́тся и́мя Твое́, да прии́дет Ца́рствие Твое́, да бу́дет во́ля Твоя́, я́ко на Небеси́ и на земли́. Хлеб наш насу́щный да́ждь нам днесь; и оста́ви нам до́лги на́ша, я́коже и мы оставля́ем должнико́м на́шим; и не введи́ нас во искуше́ние, но изба́ви нас от лука́ваго.

Го́споди, поми́луй, 12,

Прииди́те, поклони́мся Царе́ви на́шему Бо́гу.

Прииди́те, поклони́мся и припаде́м Христу́, Царе́ви на́шему Бо́гу.

Прииди́те, поклони́мся и припаде́м Самому́ Христу́, Царе́ви и Бо́гу на́шему.

Псалом 50:

Поми́луй мя, Бо́же, по вели́цей ми́лости Твое́й, и по мно́жеству щедро́т Твои́х очи́сти беззако́ние мое́. Наипа́че омы́й мя от беззако́ния моего́, и от греха́ моего́ очи́сти мя; я́ко беззако́ние мое́ аз зна́ю, и грех мой предо мно́ю есть вы́ну. Тебе́ Еди́ному согреши́х и лука́вое пред Тобо́ю сотвори́х, я́ко да оправди́шися во словесе́х Твои́х, и победи́ши внегда́ суди́ти Ти. Се бо, в беззако́ниях зача́т есмь, и во гресе́х роди́ мя ма́ти моя́. Се бо, и́стину возлюби́л еси́; безве́стная и та́йная прему́дрости Твоея́ яви́л ми еси́. Окропи́ши мя иссо́пом, и очи́щуся; омы́еши мя, и па́че сне́га убелю́ся. Слу́ху моему́ да́си ра́дость и весе́лие; возра́дуются ко́сти смире́нныя. Отврати́ лице́ Твое́ от грех мои́х и вся беззако́ния моя́ очи́сти. Се́рдце чи́сто сози́жди во мне, Бо́же, и дух прав обнови́ во утро́бе мое́й. Не отве́ржи мене́ от лица́ Твоего́ и Ду́ха Твоего́ Свята́го не отыми́ от мене́. Возда́ждь ми ра́дость спасе́ния Твоего́ и Ду́хом Влады́чним утверди́ мя. Научу́ беззако́ныя путе́м Твои́м, и нечести́вии к Тебе́ обратя́тся. Изба́ви мя от крове́й, Бо́же, Бо́же спасе́ния моего́; возра́дуется язы́к мой пра́вде Твое́й. Го́споди, устне́ мои́ отве́рзеши, и уста́ моя́ возвестя́т хвалу́ Твою́. Я́ко а́ще бы восхоте́л еси́ же́ртвы, дал бых у́бо: всесожже́ния не благоволи́ши. Же́ртва Бо́гу дух сокруше́н; се́рдце сокруше́нно и смире́нно Бог не уничижи́т. Ублажи́, Го́споди, благоволе́нием Твои́м Сио́на, и да сози́ждутся сте́ны Иерусали́мския. Тогда́ благоволи́ши же́ртву пра́вды, возноше́ние и всесожега́емая; тогда́ возложа́т на oлта́рь Твой тельцы́.

Тропа́рь, глас 2:

Послужи́в ста́рцу твоему́ преусе́рдно,/ дарова́нии духо́вными оби́льно испо́лнился еси́/ и, я́ко свети́льник верху́ горы́ укры́тися не могу́щий,/ благообра́зне Ио́сифе преподо́бне,/ мона́шествующим и мирски́м наста́вник до́брый и предста́тель те́плый яви́лся еси́,/ те́мже моли́ Человеколю́бца Христа́ и Засту́пницу Усе́рдную,// спасти́ся душа́м на́шим.

Кано́н свята́го, глас 5́.

Песнь 1

Ирмос: Пешеше́ствуяй Изра́иль непроходи́мую стезю́/ повеле́нием Влады́чним,/ ра́дуяся поя́ше:// Го́сподеви пои́м, сла́вно бо просла́вися.

Припев: Преподобне отче Иосифе, моли Бога о нас!

Чисти́тельный, Сло́ве, смысл пода́ждь песнопою́щим му́драго ста́рца О́птинскаго, и́же сло́вом наста́ви ру́сския лю́ди, немо́кренно проходи́ти мо́ре жите́йское.

Припев: Преподобне отче Иосифе, моли Бога о нас!

Амвро́сиев сын да похва́лится днесь, О́птинскаго ста́рчества вели́кий прее́мник, и́же послуша́ния по́двигом главу́ дре́вняго зми́я отсече́, те́мже и просла́вися.

Слава: Ше́ствуя стезе́ю дре́вних отце́в, воспита́вся млеко́м святооте́ческаго мудрова́ния и сла́дкий послуша́ния хлеб вкуси́в, в ме́ру отца́ твоего́ дости́гл еси́, преподо́бне, те́мже и просла́вися.

И ныне: Утро́ба Твоя́, Де́во, роди́ Высоча́йший Свет, вся́каго челове́ка просвеща́ющий и облиста́вший ад и го́рний яви́вший рай, Бо́га же и Челове́ка.

Песнь 3

Ирмос: На ка́мени за́поведей Твои́х коле́блющагося мя утверди́,/ вознеси́ рог мой в ра́зуме повеле́ний Твои́х,/ да хваля́ся вопию́ Тебе́:// несть свят па́че Тебе́, Го́споди Сил.

Припев: Преподобне отче Иосифе, моли Бога о нас!

Нра́вом ти́хий и послушли́вый, благообра́зен же лице́м и ду́хом мудр, в пе́снех да воспое́тся ста́рец О́птинский Ио́сиф, от си́лы возше́дый в си́лу и кра́йняго дости́гнувый соверше́ния.

Припев: Преподобне отче Иосифе, моли Бога о нас!

Ева́нгельское любому́дрие твою́ всечестну́ю украси́ главу́, послушли́вая же душа́ твоя́ удиви́ чинонача́лия А́нгельская: я́ко скор был еси́ на слы́шание, ко́сен же на гнев, и светосия́нен, о́тче, в моли́тве.

Слава: Раче́ние к раче́нию прилага́я, преподо́бне, своея́ отве́рглся еси́ во́ли коне́чне и, води́мый ста́рцем твои́м, восте́кл еси́ на ле́ствицу доброде́телей, вопия́: сла́ва Тебе́, Всеблага́я Влады́чице, Госпоже́ всея́ тва́ри!

И ныне: А́ще и пове́ржен бысть на одре́ боле́зненнем и к сме́рти прибли́жися, о́тче, твоя́ душа́, моли́твы не оста́вил еси́ к Богоро́дице, Я́же яви́ся тебе́ и возста́ви со одра́. Ты же вопия́л еси́: несть свя́т па́че Тебе́, Госпоже́ всея́ тва́ри.

Седа́лен свята́го, глас 4.

На вода́х воздержа́ния воспита́вся, преподо́бне,/ в ладии́ же послуша́ния к приста́нищу безстра́стия дости́гл еси́,/ я́ко мудр купе́ц, вся оста́вив,/ би́сер ева́нгельский обре́л еси́,/ те́мже и венце́м неувяда́емым увяза́ет тя Христо́с/ и прие́млет моли́твы твоя́,/ в ни́хже помина́й любо́вию тя сла́вящих и зову́щих:/ ра́дуйся, Ио́сифе, богому́дрый ста́рче.

Сла́ва, и ны́не, Богоро́дичен:

Удиви́ся Ио́сиф, е́же па́че естества́ зря,/ и внима́ше мы́слию и́же на руно́ дождь,/ в безсе́менном зача́тии Твое́м, Богоро́дице,/ купину́ огне́м неопали́мую,/ жезл Ааро́нов прозя́бший;/ и свиде́тельствуя обру́чник Твой и храни́тель,/ свяще́нником взыва́ше:/ Де́ва ражда́ет,/ и по рождестве́ па́ки Де́ва пребыва́ет.

Песнь 4

Ирмос: Услы́шах, Го́споди,/ слух Твой, и убоя́хся,/ разуме́х смотре́ние Твое́,// и просла́вих Тя, Еди́не Человеколю́бче.

Припев: Преподобне отче Иосифе, моли Бога о нас!

Смире́нием оде́явся, богоно́се, и све́тлыя стези́ послуша́ния избра́в, страсте́й треволне́ния уклони́лся еси́ и тишины́ а́нгельския сподо́бился еси́.

Припев: Преподобне отче Иосифе, моли Бога о нас!

Тве́рдый по́мысл стяжа́в, о́тче, и небоя́знен, непрекло́нен быв взыгра́нию страсте́й, духово́м нечи́стым повелева́ти возмо́гл еси́.

Слава: Ве́рен во всем ста́рцу Амвро́сию быв, того́ оте́ческия любве́ наслади́тися сподо́бился еси́, е́юже преиспо́лнився, богоблаже́нне, гре́еши ны́не и пита́еши ча́да твоя́.

И ныне: О́трок еще́ сый, присноблаже́нне Ио́сифе, младе́нческих уклони́лся еси́ игра́ний и, Цари́цы Небе́сныя посеще́ния сподо́бився, избра́нник яви́лся еси́ Тоя́ и служи́тель.

Песнь 5

Ирмос: Одея́йся све́том я́ко ри́зою,/ к Тебе́ у́тренюю, и Тебе́ зову́:/ ду́шу мою́ просвети́ омраче́нную, Христе́,// я́ко Еди́н Благоутро́бен.

Припев: Преподобне отче Иосифе, моли Бога о нас!

Радостотво́рный твой лик и богому́драя словеса́ твоя́ нощь потреби́ша мно́гих скорбе́й, и благожела́тельное твое́, преподо́бне, обхожде́ние заблу́ждшия возведе́ ко стезя́м доброде́тели.

Припев: Преподобне отче Иосифе, моли Бога о нас!

Ева́нгельская лоза́, вино́ умиле́ния иска́пающая, богора́дованное житие́ твое́ яви́ся, о́тче, потребля́ющее те́рпкое страсте́й и ду́ши веселя́щее благода́тию.

Слава: Но́вое вино́ влив в сосу́д души́ твоея́, е́же поче́рпл еси́ от исто́чника прему́дрости ста́рческия, богому́дре о́тче Ио́сифе, тем и церко́вная составле́ния напои́л еси́.

И ныне: На одре́ боле́зни по́двиг показу́ет Ио́сиф богоблаже́нный, песнь хвале́бную Ма́тери Све́та при́сно вознося́, те́мже и посеще́ния от Нея́ сподо́блен быва́ет и свиде́тельствуется, я́ко избра́нник Пречи́стыя.

Песнь 6

Ирмос: Неи́стовствующееся бу́рею душетле́нною,/ Влады́ко Христе́, страсте́й мо́ре укроти́,/ и от тли возведи́ мя,// я́ко Благоутро́бен.

Припев: Преподобне отче Иосифе, моли Бога о нас!

О́птинский кла́дязь отве́рзеся, вода́ благода́ти быстрообра́зно потече́, и весели́т собра́ния пра́зднующих, подая́ исцеле́ния да́ры.

Припев: Преподобне отче Иосифе, моли Бога о нас!

Стори́чный плод принесе́ твоя́, Ио́сифе, ни́ва, богому́дро тебе́ возде́лавшу зе́млю души́ своея́, те́мже, над страстьми́ воцари́вся, хле́бом богове́дения пита́еши чад твои́х.

Слава: Лука́вый змий умертви́ся твои́ми моли́твами, нощь же разсе́яся мно́гих скорбе́й, и, я́ко со́лнце, тече́т, о́тче Ио́сифе, твоя́ изрядноско́рая по́мощь.

И ныне: Амвро́сию богому́дрому я́ко хле́бов Спори́тельница, Ио́сифу же я́ко Цели́тельница яви́лася еси́, Богоро́дице, те́мже, обою́ хода́тайству вне́млющи, сугу́бую благода́ть нам пода́ждь.

Конда́к свята́го, глас 3.

Кро́тостию и незло́бием украси́вся/ и целому́дрием в ле́поту оде́явся,/ тьму страсте́й прогна́л еси́,/ светолу́чныя же испуща́я, о́тче, моли́твы,/ яви́лся еси́ ста́рчества О́птинскаго похвала́ и изря́ден наста́вник мона́хов,/ те́мже вси зове́м ти:// ра́дуйся, богоно́се ста́рче Ио́сифе.

И́кос:

Со́лнцу заше́дшу, быва́ет нощь и тьма по всей земли́, оба́че не та́ко бысть, егда́ за́йде во гроб богому́дрый ста́рец Амвро́сий: сей бо вои́стину яви́ся со́лнце богосве́тлое О́птины пу́стыни и сы́на своего́ оста́ви на тве́рди церко́вней, я́ко преди́вное свети́ло, и́же моли́твенными блиста́ет луча́ми и изсуша́ет страсте́й му́тныя ре́ки, утвержда́ет Ша́мординскую оби́тель и О́птину озаря́ет пу́стынь. Те́мже с ра́достию вси, приходя́ще к ра́це моще́й его́, воззове́м: ра́дуйся, богоно́се ста́рче Ио́сифе.

Песнь 7

Ирмос: Огня́ гаси́лище отроко́в моли́тва,/ ороша́ющая пещь пропове́дница чудесе́,/ не опаля́ющи, ниже́ сожига́ющи// песносло́вцы Бо́га оте́ц на́ших.

Припев: Преподобне отче Иосифе, моли Бога о нас!

Досто́йный учени́к был еси́ твоего́ ста́рца, о́тче Ио́сифе, бога́тство дарова́ний, я́коже ми́лоть Илиину́, насле́довав, те́мже мно́гая твоя́ чудеса́, блаже́нне, просла́виша Бо́га оте́ц на́ших.

Припев: Преподобне отче Иосифе, моли Бога о нас!

К ра́це моще́й твои́х приходя́щим источи́, о́тче Ио́сифе, духо́вное питие́, остужа́я пла́мень страсте́й, ду́ши же напая́я благода́тию, е́же сла́вити Бо́га оте́ц на́ших.

Слава: Амвро́сия ста́рца ве́рный учениче́ и после́дователю, пе́рвый во обре́тении моще́й показа́лся еси́, Ио́сифе, вседарови́тую благода́ть ча́дом твои́м пода́в, е́же песносло́вити Бо́га оте́ц на́ших.

И ныне: Глаго́л Твой сла́дкий, Де́во, ста́рца Ио́сифа укрепи́ на одре́ боле́зненнем, я́ко рекла́ еси́, Богороди́тельнице: потерпи́, люби́миче Мой, еще́ венцы́ соплету́ тебе́ во Ца́рствии Сы́на Моего́ и Бо́га.

Песнь 8

Ирмос: От Отца́ рожде́ннаго пре́жде век/ Бо́га Сло́ва,/ по́йте, свяще́нницы,// лю́дие, превозноси́те во вся ве́ки.

Припев: Преподобне отче Иосифе, моли Бога о нас!

От ста́рца рожде́нием духо́вным произше́дшаго, сы́на послушли́ваго, Ио́сифа боголюби́ваго, лю́дие, превозноси́те во вся ве́ки.

Припев: Преподобне отче Иосифе, моли Бога о нас!

Вообрази́ся в тебе́ дух ста́рца твоего́, и чудесы́ украси́лся еси́, о́тче Ио́сифе, те́мже сугу́бое почита́ние воздаю́т тебе́ лю́дие во вся ве́ки.

Слава: Иде́же почива́ет многоцеле́бное те́ло твое́, ту благода́ть струя́ми то́чится и почерпа́ют исцеле́ния лю́дие, с ве́рою к тебе́ приступа́юще.

И ныне: На Ма́терь Бо́жию вознаде́явся, преподо́бне, во упова́нии твое́м неколеби́мь пребы́л еси́, я́ко гора́, преподо́бне, и я́ве предста́ тебе́ Всенепоро́чная и уте́ши тя.

Песнь 9

Ирмос: Я́ко сотвори́ Тебе́ вели́чия Си́льный,/ Де́ву явль Тя чи́сту по рождестве́,/ я́ко ро́ждшую без се́мене Своего́ Творца́,// тем Тя, Богоро́дице, велича́ем.

Припев: Преподобне отче Иосифе, моли Бога о нас!

Амвро́сиеву сла́ву стяжа́в, богоно́се, в ме́ру своего́ учи́теля, по сло́ву Госпо́дню, дости́гл еси́, те́мже и чудоде́йствуеши пресла́вная зна́мения и исцеля́еши ко гро́бу твоему́ притека́ющих.

Припев: Преподобне отче Иосифе, моли Бога о нас!

Пшеницода́вец нов яви́лся еси́, Ио́сифе, богоглаго́ливыми уче́нии твои́ми и́нокини Ша́мординския пита́я и ма́нною слове́с твои́х ве́рных сердца́ оживля́я, те́мже тя вси велича́ем.

Слава: О́птину пу́стынь украси́л еси́ ра́кою моще́й твои́х, пе́рвым возсия́в из-под спу́да, ны́не же при́сно све́тиши, преподо́бне, на Небеси́ церко́внем, све́тлость подая́ душа́м, тя велича́ющим.

И ныне: Ю́же возлюби́л еси́, преподо́бне, Де́ву Богоро́дицу и твои́ма очи́ма зрел еси́, еще́ сый на земли́, Тоя́ ны́не сладча́йшаго насыща́ешися лицезре́ния. Моли́ Сию́, богоблаже́нне, спасти́ тя велича́ющия.

Свети́лен.

О преподо́бне о́тче Ио́сифе, ты еси́ вои́стину звезда́, све́тло сия́ющая, освеща́еши бо зе́млю Ру́сскую све́том чуде́с и Боже́ственныя по́мощи. Сего́ ра́ди, честну́ю па́мять твою́ ны́не ве́рою пра́зднующе и ра́достию серде́чною веселя́щеся, велича́ем Христа́ Бо́га на́шего.

Моли́тва

О преподо́бне о́тче Ио́сифе, ста́рче О́птинский, ча́до возлю́бленное вели́каго ста́рца Амвро́сия! Ты, от ю́ности Христа́ возлюби́в, да́же до сме́рти ве́рен Тому́ пребы́л еси́ и избра́нник возлю́блен Пречи́стыя Богоро́дицы яви́лся еси́. Ели́цы же не́когда лик твой благода́тный ви́деша, весе́лия Небе́снаго вы́ну исполня́хуся, та́ко и мы, о́тче, днесь к честны́м твои́м моще́м (или́: к твоему́ свято́му о́бразу) припа́дающе, мо́лим тя: изба́ви нас от го́речи грехо́вныя, е́юже нас сопроти́вник напои́, помози́ нам немощны́м, до́лу пони́кшим, не земна́я то́кмо и тле́нная зре́ти, но душе́ю живо́ю к житию́ ве́чному устремля́тися, грехо́в осужде́ния и злопомне́ния изба́витися, за́висти и гне́ву не предава́тися, да тиша́йшее дыха́ние благода́ти серде́ц на́ших ко́снется. Ей, о́тче, ты дар сове́та и блага́го разсужде́ния стяжа́л еси́, наста́ви и нас жизнь свою́ по во́ли Бо́жией устроя́ти. И та́ко, тобо́ю окормля́еми, пра́во по́йдем путе́м спаси́тельным и дости́гнем Ца́рствия Небе́снаго, иде́же вку́пе со все́ми святы́ми сподо́бимся прославля́ти Пресвяту́ю Тро́ицу, Отца́, и Сы́на, и Свята́го Ду́ха, во ве́ки веко́в. Ами́нь.

Окончание

По прочтении канона и молитвы, чти:

Досто́йно есть я́ко вои́стинну блажи́ти Тя, Богоро́дицу, Присноблаже́нную и Пренепоро́чную и Ма́терь Бо́га на́шего. Честне́йшую Херуви́м и сла́внейшую без сравне́ния Серафи́м, без истле́ния Бо́га Сло́ва ро́ждшую, су́щую Богоро́дицу Тя велича́ем.

Таже: Сла́ва Отцу́ и Сы́ну и Свято́му Ду́ху, и ны́не и при́сно и во ве́ки веко́в. Ами́нь:

Го́споди, поми́луй, трижды.

И отпуст.

Го́споди, Иису́се Христе́, Сы́не Бо́жий, моли́тв ра́ди Пречи́стыя Твоея́ Ма́тере, преподо́бных и богоно́сных оте́ц на́ших, святаго (имя святого, емуже читался канон) и всех святы́х, спаси́ и помилуй мя, гре́шнаго, яко Благ и Человеколюбец.

Канон преподобному Иосифу Оптинскому